ઉપાધી આજીવન દઈ બે ઘડીની મોજ આપીને,
ધણા હળવા થયા સસરા અમને બોજ આપીને.

વગર કીધે જ સમજી જાઊં છું સંજ્ઞા ખરીદીની,
વળાવે ઓફીસે થેલી મને દરરોજ આપીને.

રીટાયર્ડ ફીલ્ડમાર્શલનો દરજ્જો હો મળ્યો જાણે,
થયા છે ફ્રી સદંતર એ અમને ફોજ આપીને.

થયા કરતી નિરન્તર આવ-જા ઘરમાં સગાઓની,
ગયા હો બાપ-દાદા કેમ જાણે લોજ આપીને.

છું મેનેજર તો મોડું થાય છે ક્યારેક કારણ સર…
વિમાસણમાં મુકે છે એ મને ‘શો ક્રોઝ’ આપીને.

ચિકિત્સક મૂળ કારણ મુજ અનિંદ્રાનું નથી સમજ્યા,
લઈ પૈસા, ને દે છે ઉંઘ એ કમ્પોઝ આપીને.

ખબર છે કે સૂરણ છે પથ્ય મુજને ખાસ તકલિફમાં,
લીયે છે ક્યા જનમનું વેર એ ભીંડૉ જ આપીને.

ઘણાં કડવાં વચન કેરી મળે છે રોજ કડવાણી,
કવચિત રાખે ય છે મને વ્હાલનું ગ્લુકોઝ આપીને.

મને રહેવા જ દો બહુ કામમાં સાકરીયા માબાપ!
સજા ક્યાં *દીયો છો ‘જમશેદજી નવરોઝ’ આપીને!

‘લલિત’ મનમાં સુતેલા સળવળે છે મજનું હમણાંથી,
થયો છું બોર હું કેવલ પતિનો “પોઝ” આપીને.

લલિત વર્મા – મુંબઈ

* જોડાક્ષર

( પૈસાનું ઝાડ – પ્રિન્ટ મની )

મળે પૈસાનું ઝાડ તો મજા આવે,
શરાબે ચાલે નાડ તો મજા આવે.

મહેનત કરવી તો નથી જરા ગમતી,
જળે જીવે આ હાડ તો મજા આવે.

શરીરે આ બળ તો નથી પછી શું છે?
પડાવું ચૂંટયે રાડ તો મજા આવે.

મને સૌએ બાંધેલ ભૂત જેવો કૈ,
રહે મારો વળગાડ તો મજા આવે.

રહી સામે ‘સાગર’ કરી શકે શું કૈં,
પછીતે પાડું ધાડ તો મજા આવે.

‘સાગર’ રામોલિયા