કચ્છનું રણ , છબી – અહીંયાથી

રણવગડામાં દરિયા રે બેફામ ઝાંઝવાં!
કેમ કરીને તરવાં રે બેફામ ઝાંઝવાં!

ધોમ ધખેલા તડકા ઊભા ફાટયા રે બેફામ ઝાંઝવાં!
અંગારાના તીર ધધખતાં ફૂટયાં રે બેફામ ઝાંઝવાં!

તગતગતી રેતીના ડામેડામ અરે બેફામ ઝાંઝવાં!
અકળાતી લાગણીઓ શોધે ગામ અરે બેફામ ઝાંઝવાં!

હૈયાની ભીતરમાં લીલું નામ અરે બેફામ ઝાંઝવાં!
આંખોની આગળ બળબળતો અંજામ અરે બેફામ ઝાંઝવાં!

રોમ રોમથી પ્યાસ થઈને ફૂટે રે બેફામ ઝાંઝવાં!
આકુળવ્યાકુળ દિલ થઈને તૂટે રે બેફામ ઝાંઝવાં!

સામે કાંઠે ફરફરતી લીલાશ અરે બેફામ ઝાંઝવાં!
આ કાંઠા પર વલખાં મારે આશ અરે બેફામ ઝાંઝવાં!

કનુ મહેતા ‘વ્યોમ’

ગઈ કાલની વાતની ડીસામાં વરસતા અંગારા જેવી ગરમી પડતી હતી પણ સાંજ પછીના વરસાદે થોડીક ઠંડક આપી છે અને તેને અનુરૂપ એક ગઝલ હોય તો મોજ આવી જાય.

હવાનો ભાર કાયમ વા પવનમાં છે,
પ્રણય તારો અશ્રુભીના નયનમાં છે.

કહું તો શું કહું તમને વધારામાં,
તમારી યાદ રોજરોજ મનમાં છે.

મુલાકાતો અટકી છે વર્તમાને તો,
દીપાવી ચેતના તો સજની તનમાં છે.

લગાવી ડુબકી સાગર સમા જીવમાં,
તો જગ આખું સહજ રીતે મંથનમાં છે.

સુરેશભાઈ ચૌધરી ‘સૂર’

શ્રી ચીનુભાઈ મોદીના અથાગ પ્રયત્નો બાદ માત્ર ચાર શેરની ગઝલ લખવી શક્ય બન્યું છે. અને આ પણ એક એવો જ પ્રયત્ન છે. ડરના કારણે આજ સુધી ક્યારેય ગઝલ લખવાનો પ્રયત્ન કર્યો નહોતો પણ આ ગઝલનો છેલ્લો શેર લખવા મથામણ જરુર કરી હતી.